يا ولاد الايه
رغيف العيش بربع جنية
والربع جنية منين ألاقيه
وأنا شايل كل نجوم الليل
فى علبة صفيح
والنجمة يوماتى تأنَب فيا
عاوزانى أجيب ليها ألف ومية
ما تقول يا أخينا .. ماتقول يا فصيح
منين أنا اجيب الربع جنية .......؟
وتقولى كمان المدرسة جاية
عاوزين جزمة
وكرافته شياكة
وفيونكة وتُولَى
ما أنا قلت تقولى
يا بابانا.. عاوزين الشنطة كمان بالورد
وبلوفر صوف علشان البرد
آه من البرد .. آه من البرد
ده رغيف العيش بربع جنية
أجيبلك ورد ولا يجيلك برد
يا اخوانا يا هو
دى علبه صفيح
مش قادر حتى اتنفس فيها شوية فرح
أنا بس بحس بطعم الجرح
الجرح الغامق .. جرح وبح
قول يا افندى قول يا فصيح
واخويا الواعى
نط من العلبة التانية.. راح ع أطاليا
لية يا حسين هتروح ع أطاليا
سنة ولا اتــــنــــيـــــن
متخفش ... انا جاى يا خويا
بحب بلدنا ومقلتش لأ
بس يا خويا كتير الخلق
إن جيت للحق
الوزرا تمام
بصراحة يا خويا
عاملين الواجب وكمان بزيادة
بيحبوا بلدنا حب عبادة
دول عاملين الحق
نفسى أشوفة الراجل دة اللى اسمه الحق؟
معلش يا سحس ..
البحر كدة - زى بلدنا - يا يشيـــــــــــــلك فوق
يا تغرق تحت
و ولاد الأية بيقولو عليك كمان طمــــــــــــــــــــــــــاع
بعد ما كنت فى أسوأ قــــاع
طماع .. قرَاع .. هزَاع .. فزَاع
ما هتفرقش اهو كله قُراع
واديك روحت
وروحك فين؟؟؟؟
روحك راحت عند الحق
خلاص يا حسين
لقيت الحق
عرفت الحق
يا ولاد الاية .... عرفـــــــــــــــــــــتوا الحق ؟؟
الأسكندرية
