كــــش .. مــات

كــــش .. مــات 

- اليوم الأول :

استعطفته أن يعلمها كيف لها أن ترتب قطع الشطرنج فوق الرقعة ذات الأربع وستين مربعا ..  شارحا جميع حركاتها الشاقولية والقُطرية .

- اليوم الثانى :

طلبت منه أن يكون هو منافسها الأول - هو المحترف - !! ؛ - رغم عدم أهليتها - وافق و وعدها بأن ينازلها .

- اليوم الثالث :

عند بداية المبارة ، مازحته ، وأبت إلا أن تغير اسم الملك بـ " الملكة " و أن يصرع جميع بيادقه بنفسه ..

 فكر ملياً .. تنازل لها حباً - كاسرا كل قواعد اللعبة -

- اليوم الرابع : 

تسللت فجراً .. وبنقــلة أولى و وحيدة ..ممسكةً بإحدى القلعتين ، مبتسمةً ، قفزت بها فوق الفيلة و بيادقها ، أسرت كل القطع المعادية ،أوقعت الملك فى المصيدة ،  ثم صاحت :

كـــــش .. مات 

- اليوم الخامس :

تفقد أثرها فى كل المربعات البيضاء والسوداء .. 

فى الليل ، رآها فيما يرى النائم .. بأنياب شديدة البياض تخرج من أنفها فى وجه شديد السواد .. وتبتسم - أيضاً-

أستيقظ من منامة .. استيقاظاً كاذبا .. حطم كل رقع الشطرنج  .. و غط فى " نوماً كاذبا" مرة أخرى  .. غير مؤهلا نفسياً لإستيعاب ما حدث !!

ما بتفهموش

محتاجين عمرين تلاتة فوق عمرنا ..
عشان نلحق نفهم كل اللى اتشرحلنا .. 
احنا مش اغبيا .. 
احنا بس محتاجين حد يقولنا .. 
ازاى بنقوم فى نهار ظلامة أكتر من نور شمسنا ..

يا اللى بتقولوا علينا احنا العيال الغلبانين ..

أنتم ما بتفهموش ..

ايوة .. ما بتفهموش ..

لما سبتونا نعد خطوات حياتنا .. 

على عمدان نور متكسرة فى شوارعنا المظلمة ..

ولا على باصات قديمة مركبنهاش ..

ولا على عدد الشحاتين قدام جوامع حينا ..

ولا على صدقة خطفناها من جيوبنا .. علشان نصهم كانوا مخبرين .. 

والله بيبان على وشوشهم تلج .. ساعة الظهر .. وفى نص يوليو ..

دة أنتم ما بتفهموش ..

صرخات حياتنا .. يوم ولادتنا .. 

أبداً .. ما كنتش  خوف 

صرخات حياتنا  .. يوم ولادتنا ..

وانتوا قالبين راسنا تحت .. رجلينا فوووووووق ..

ما كنتش خوووووف ..

استغفلونا .. 

استغفلونا .. وقولوا لينا .. خلوا الدم يجرى فى عروقكم ..

دة انتم سرقتوا الدم قبل ما يسكن فى قبوره .. 

وبننتظر الليل بطوله ..

علشان مسحراتى حينا .. يقولنا .. يلا .. الفجر قرب ..

وصاحبنا بيتسحر بأحلامنا الجميلة جوة بطونه ..

ازاى نشوف ضى السما بعد الفجر ما يشقشق لنا .. 

ازاى نشوفة واحنا دماغتنا تحت .. رجلينا فوووووق ..

مش بقولكم عاوزين عمرين تلاتة فوق عمرنا .. علشان نفووووق ..

صرخات حناجرنا يوم الختان .. ماكنتش خوف ..

كانت اعتراض .. كل واحد من اللى اللئام ..

كانت اعتراض .. على كل خوف ..

اوهمتونا بية.. دة عيب ..دة غلط .. ودة أدب ..  ودة حرام ..

دموع عيونا .. وصرختى 

فى أول يوم حضانة ..

وانا بهرب من بين ايد أبلتى ..

ماكنتش خووووف .. 

كانت هروب من الحرووووف .. 

للفضـــــــــــا ..

الفضا الواسع اللى دايما واقف على بابة .. واحد اسمه العسكرى ..

بشنبات كبيرة .. بحلم بية كل ليلة جوة مخدتى ..

أيوة كنت عاوز اهرب للفضا ..

اللى على شباكة .. سجان .. هيحبسنى لو فكرت يوم حتى أحلم بالفضا ..

مش بقولكم .. انتم ما بتفهموش ..

تقدروا دلوقتى بقى .. تقولونا لية ؟؟..

لية رعبتونا من أى واحد لابس بدلة كاكى .. ولا على كتافة النحاس .. ؟

تقدروا ؟؟

ايوة يومها كنت سامع غراب بينادى .. حمار بينهق .. وكنا بنلعب مع البط اللى  بيبلبط وعمال يكاكى ..

ما تقولوا لينا ؟؟!! عملت فيكوا أية  البدلة .. والبندقية و النحاس !! 

ولا دة كان وراثة فى الأساس !!

مستودع أدرينالين حياتنا قرب ينتهى .. وانتو السبب ..

تقدروا دلوقتى تشرحوا لينا ؟؟!! 

يوم ما اتولدنا ..

لية ما أخدتوش رأينا ..

فى حاجة كانت ملكنا ..

أسامينا .. 

اللى بينادونا بيها ..

 فى الشوارع ..

فى المعسكر ..

فى السجون .. 

لية ما أستنتوش لما نكبر ..

يمكن كنا نغير رأينا .. فى شئ كان ملكنا ..

مش بقولكم  .. ما بتفهموش .. 

وأحنا بردة مش أغبيــــــــــــــــــــا ..

بس محتاجين عمرين تلاتة فوق عمرنا ..

فبراير 2014